වාර්තාගත උණුසුමෙන් යුරෝපය ගිනියම් වෙයි - අධික රස්නයෙන් බේරීමට අනාරක්ෂිත ස්ථානවල පිහිනීමට ගිය ප්‍රංශයේ පුද්ගලයින් 40ක් ජීවිතක්ෂයට

යුරෝපය පුරා මේ දිනවල පවතින අතිශය දරුණු උණුසුම හේතුවෙන් ප්‍රංශයේ අනාරක්ෂිත ස්ථානවල පිහිනීමට ගිය පුද්ගලයින් 40 දෙනෙකු සති අන්තයේ සිට මේ දක්වා දියේ ගිලී මියගොස් ඇති බව විදෙස් මාධ්‍ය පවසනවා.

අධික රස්නයෙන් බේරීම සඳහා විල් සහ ගංගාවලට බැසීමට යාමේදී මෙම අනතුරු සිදු වී ඇති බවයි වාර්තා වෙන්නේ,

ප්‍රංශයට අමතරව බ්‍රිතාන්‍යය, ඉතාලිය සහ ස්පාඤ්ඤය ද මෙලෙස දැඩි උණුසුමෙන් පීඩා විඳිමින් සිටින අතර, සමහර ප්‍රදේශවල වාර්තා වූ අධික උෂ්ණත්වය හේතුවෙන් පාසල් වසා දැමීමට සහ ප්‍රවාහන ජාලයන් තාවකාලිකව අත්හිටුවීමට ද බලධාරීන් පියවර ගෙන තිබෙනවා.

ලෝක කාලගුණ විද්‍යා සංවිධානය (WMO) පෙන්වා දෙන්නේ යුරෝපය ගෝලීය සාමාන්‍ය අගයට වඩා දෙගුණයකටත් වඩා වේගයෙන් උණුසුම් වෙමින් පවතින බවයි.